{"id":844,"date":"2022-04-07T13:12:30","date_gmt":"2022-04-07T13:12:30","guid":{"rendered":"https:\/\/www.siderlandet.no\/?p=844"},"modified":"2026-03-04T13:29:01","modified_gmt":"2026-03-04T13:29:01","slug":"gardsbrenneriet-as","status":"publish","type":"post","link":"https:\/\/www.siderlandet.no\/en\/gardsbrenneriet-as\/","title":{"rendered":"Gardsbrenneriet"},"content":{"rendered":"

\n\t\tGARDSBRENNERIET\n\t<\/h2>\n

Gardsbrenneriet ligg solrikt og lunt til p\u00e5 Hauge, p\u00e5 nordsida av Gloppefjorden i Nordfjord. Gloppen er kjend for eit sterkt landbruk og eit levande lokalmatmilj\u00f8 – her foredlar vi lokale r\u00e5varer til unike smaksopplevingar.<\/p>\n

Verksemda vart starta av Synn\u00f8ve og Jann i 2012 p\u00e5 familiegarden J\u00f8rnbruket. Det som byrja med pressing av eigne eple, har utvikla seg til eit eplepresseri, sideri og handverksdestilleri med eit breitt spekter av drikkevarer. Vi lagar mellom anna alkoholfri sider, handverksbrus, briske\u00f8l, tonic, sider, hard seltzer, handverkscocktailar, frukt- og b\u00e6rlik\u00f8rar, vodka, rom, gin, akevitt og fruktbrennevin.<\/p>\n

Vi har ein sterk trong til \u00e5 utvikle nye produkt basert p\u00e5 norske r\u00e5varer. Kombinasjonen av dyrkekompetansen og tradisjonshandverket vi l\u00e6rte av k\u00e5rfolket p\u00e5 garden og fagutdanninga v\u00e5rt som kjemikarar har gjort det mogleg for oss \u00e5 utvikle eige produksjonsutstyr og eigne metodar. Slik skaper vi innovative produkt som mysebrennevin – laga av ein restressurs fr\u00e5 osteproduksjon – rom basert p\u00e5 norske sukkerbetar og fermentert hard seltzer.<\/p>\n

Vi jobbar aktivt med berekraft og god ressursutnytting. Utsorterte r\u00e5varer som pressfrukt, plommer, myse og potet f\u00e5r nytt liv hj\u00e5 oss. Heile verdikjeda, fr\u00e5 r\u00e5vare til ferdig produkt, skjer i v\u00e5r eiga verksemd. Hj\u00e5 oss f\u00e5r du smaken av Nordfjord – fr\u00e5 jord til glas.<\/p>\n

Gardsbrenneriet – fr\u00e5 vestlandsjord til edle dr\u00e5par<\/h3>\n

J\u00f8rnbruket – ein gard med lange tradisjonar<\/strong><\/p>\n

J\u00f8rnbruket er ein del av den gamle storgarden Hauge, med spor av busetnad heilt tilbake til eldre jernalder. Her har det vore dyrka frukt sidan 1800-talet, og sidan 1930-talet har planteoppal og gr\u00f8nsaksdyrking vore ein del av drifta. Det gode fjordklimaet gir ypparlege vekstvilk\u00e5r for frukt, b\u00e6r og gr\u00f8nsaker og vi har til og med v\u00e5r eigen eplesort – Haugeeplet.<\/p>\n

M\u00e5neskinshagen – \u00f8kologisk dyrking og kulturarv<\/strong><\/p>\n

I dag dyrkar vi \u00f8kologiske eple og rabarbra p\u00e5 j\u00f8rnbruket. Vi tek vare p\u00e5 kulturarven ved \u00e5 satse p\u00e5 historiske sortar, og vi podar epletre og alar opp rabarbraplantar sj\u00f8lve. Vi dyrkar ogs\u00e5 andre vekstar til bruk i drikkevarene v\u00e5re – mellom anna dill til sommarakevitten v\u00e5r.<\/p>\n

Om v\u00e5ren har vi \u00f8kologisk planteoppal med over 100 ulike sortar gr\u00f8nsaker og krydder. Vi legg s\u00e6rleg vekt p\u00e5 gamle kulturarvsortar som er godt tilpassa fjordklimaet.<\/p>\n

To bes\u00f8ksstader<\/strong><\/p>\n

Gardsbrenneriet og M\u00e5neskinshagen – \u00d8vre Nordstranda 96<\/em><\/p>\n

P\u00e5 garden finn ein frukt- og b\u00e6rpresseri, sideri og destilleri. Her vidareforedlar vi ogs\u00e5 utsorterte r\u00e5varer som pressfrukt, plommer, myse og potet – og gjev dei nytt liv som edle dr\u00e5par.I sommarsesongen kan ein bestille omvising p\u00e5 garden og l\u00e6re meir om historia, r\u00e5varene og produksjonen.<\/p>\n

Fr\u00e5 midten av april til midten av juni har vi sj\u00f8lvbetent utsal av \u00f8kologiske gr\u00f8nsaks- og krydderplantar ved nedk\u00f8yringa til garden.<\/p>\n

Nordfjord Distillery – Industrivegen 12<\/em><\/p>\n

Her finn ein det moderne tapperiet v\u00e5rt og eit heil\u00e5rsope fabrikkutsal.<\/p>\n

I fabrikkutsalet kan ein handle lokalmat og v\u00e5re alkoholfrie og l\u00e5galkoholhaldige produkt. Om v\u00e5ren tilbyr vi \u00f8kologiske dyrkefr\u00f8, og om hausten finn ein utstyr og r\u00e5varer til vidareforedling av frukt og gr\u00f8nt.<\/p>\n

Her kan ein ogs\u00e5 bestille omvising og smaking i Gildehallen – Nordfjord Distillery baren v\u00e5r.<\/p>\n

Velkomen p\u00e5 bes\u00f8k i 2026<\/strong><\/p>\n

Vi tilbyr:<\/p>\n